الرئيسيةس .و .جبحـثالتسجيلالأعضاءالمجموعاتدخولفراشـــــــــــــــــة

شاطر | 
 

 قصة ثلاث بنك واحد

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
فراشة حائرة
مدير المنتدى
مدير المنتدى
avatar

عدد الرسائل : 1280
العمر : 29
sms :


My SMS
معـــــــــــا للارتقاء بالمنتدى


سبحان الله وبحمده


الاوسمة :
&n :
علم :
المهنة :
النادى المفضل :
تاريخ التسجيل : 04/12/2007

مُساهمةموضوع: قصة ثلاث بنك واحد   2008-07-13, 3:58 pm

بدايتي أستعين بالله العلي العظيم وبأسمه الرحمن الرحيم

قصة ثلاث بنات بنك واحد ..ايه لكل بنت لها حياة ولكل منا لها شخصية وشكل قبل مااقول انا أي بنت ؟ راح تكون هالقصة تعب وشقى قبل لاتكون ضحكه وفرحه راح نكتب قصتنا وشقى ايامنا فيها وبالصراحه.. احنا تعبنا علشان نلقى منتدى ننزل فيه القصة علشان جذي أتمنى إذا أعجبتكم القصة وتبون تنزلونها بمنتدى معين تنزل معها الاسماء ومو تنتسبونها لكم بالذمه ...

احنا ثلاث بنات كويتيات من قبيله معروفة تربينا تربيه طيبه والخوف من الله قبل الخوف من الناس كبرنا وكبرت معانا اشياء كثيره طيبه اكيد فينا عيوب لكن كل وحده فينا راح تذكر لكم مميزاتها وعيوبها بكل صراحه !

وراح تكون لكل منا لون مختلف بالكتابه علشان تميزون منو الي تروي قصتها فينا وراح تنزل كل منا ايميلها الخاص علشان اذا أي احد حاب يتواصل مع أي وحده فينا يتواصل وابي منكم الردود الطيبه والنقد البناء مو تجرحون وتسبون

<<مسويه مشهوره نقد بناء هاهاي

انا نوف عمري 22 سنة مواليد 21\1\1985 وبالهجري والله مااعرف بس راح اقولكم اشوف شهادة الميلاد واقولكم.. بالنسبه لي بين كل فقره راح اكتب لكم كم بيت منقول او من ابداعاتي الشعريه
<< مسويه شاعره
البداية:
كنت صغيره (اكيد كنتي صغيره اجل والده وانتي كبيره )هاهاي المهم كنت انطوائيه حيل كنت خجوله وكتومه ودمعتي جاهزه بطرف عيني وبجايه (يعني بكايه ) احب ماي مذر اند ماي فذر وماي سيسترز وماي برذرز ..كنت ااقول لنفسي انا موحلوه هل كنت فعلا مو حلوه ولا ماكنت اشوف الا الاشياء الي مو حلوه فيني ويجوز اني كنت فعلا مو حلوه ..كبرت ونضجت وصرت اشوف المميزات الحلوه فيني: قوامي حلو. شعري طويل واسود. عيوني عسليه .وبشرتي حنطاويه. وليه ماقول لنفسي حلوه وكل هالاشياء الحلوه ذي فيني قلت في نفسي راح انسى الاشياء الشينه فيني وأتذكر بس الاشياء الحلوه.هذا بالنسبه لشكلي..
طبيعتي لما كبرت صرت اميز الامور بشكل اوضح بس لازال فيني شي من الكتم ومازالت دمعتي بطرف عيني ..
بس عرفت مثل مافي هالدنيا شي مو حلو في اشياء كثيره حلوه ولازم استقلها مع عدم تعدي حدودي
طيبه .عصبيه. غيوره .دلوعه .غثيثه بس مو دايم كل هالصفات فيني ..

راح اتكلم ايام المدرسه بالمتوسطه مع اني مااحب اذكرها لان مافي شي حلو اتذكره
تو ببداية المراهقه وفي زمن يخوف في صف كله تقريبا بنات لهن قرند بوي مثل مايقولون رفيج مالهن سيره غير هالرفيج رفيجي ورفيجي اليوم رفيجي بيجي بالهده علشان يعطيني هدية عيد الميلاد رفيجي مشتاقلي كان مسافر ويبي يشوفني تخيلو صف جذي ماكان همهن الدراسه كان كل همهن هالرفيج بالصراحه انا مااحتكيت بأحد كنت خوافه . مااعرف اميز ان كانت ذي زينه ولا موبزينه علشان جذي جبتها من ئصرها زي مابيقلون وماتعرفت على احد كبرت شوي انتقلت من المرحله المتوسطة الى المرحلة الثانوية ..

شرايكم نوقف شوي بكم بيت من الشاعره جرح العيوف

من علّم اعماقي البكا..من خلى هالفرحه تذوب
""""""""""""""""""من علّم آخر جرح بي انه "ف"حياته ماإمتحن
من علّم الصمت الحكي..من كفّن الدنيا بثوب
""""""""""""""""""من شق حنايا هالصدر..وسكّن في اعماقه شجن
من علّم الطفل الصياح ؟من علّم الريح الهبوب
"""""""""""""""""من ارخى اهداب الجروح..ونصت عيوني للسكن
.
بأولى ثانوي بالصراحه صرت اشوف نفسي حلوه و بديت أميز البنات واعرف الزينه من الي موبزينه ..تعرفت على بنات عسل زي العسل عشت حياة الصداقه شلون صايره وكيف صايره صرت اسولف أضحك وبكل ثقه وبدون خوف لأني واثقه من الي أسولف معاهن ..بس حسافة يافرحة ماتمت تصدقون عمري مارسبت الا بهالسنه !.. نسيت أقولكم أني بهالسنه تنقبت . وبالصراحه لما رسبت ضاقت بي الدنيا قلت لازم اغير المدرسه بأي طريقة وبالفعل غيرتها كنت في مدرسة عامه مع اختي اميره ونتقلت في مدرسة المقرارات أول كورس رديت مثل طبيعتي يوم كنت صغيره الخجل والانطواء يافرحه ماتمت من بعد ماحسيت اني بديت انضج واحس بثقه بنفسي ارد للي كنت فيه " وعسى أن تكرهوا شيئا وهو خير لكم " الحمدلله والشكر على كل حال اللهم لاأعتراض رضيت وتوكلت على الله وكملت تعرفت على شلة بنات محترمات بس فيهن ذرة شطانه بتسئلوني كيف أنا اقولكم كل وحده فيهن لها قصة حب بس مو مع أي أحد يعني وحده ولد عمها وحده ولد خالها ولد خالتها وجذي وكل وحده فيهن تروي لي قصتها مع الي تحبه ومواقف صارت لها ..انا بعد احب ايه احب بس ماكنت ابوح بهالشي لأي احد مثل ماقلت لكم كتومه. أول في بداياتي بداية المراهقه اقصد كنت انا واختي اميره نجلس بالساعات وكل وحده منا تكتم الي في قلبها واذا جينا نبي نحاول نعترف لبعض كل وحده فينا تكذب.. مثلا انا مااكنت اقولها اني احب خالد ايه خالد اسمه خالد وهي ماكانت تقولي منو تحب كانت تقولي مااحب أحد وساعات تقولي احب اسم محمد وانا كنت اشك فيها بس مااحب اضغط عليها كنت احس ان هالشي خاص فيها..تبون تعرفون قصتي مع خالد ماهي قصة؟ هي حياتي انا.. هي طفولتي. مراهقتي. نضجي. كانت معاه!! وانتهت قبل لاتبتدي تخيلوا وحده تحس بأحاسيس تجاه شخص وماتدري وش هالشي الي في داخلها اتجاه هالانسان صعب الشعور وصعب التفكير فيه حتى ..
تخيلو ان خالد مو بلي خالد لبنت عمه وبنت عمه خالد لها.. .. تعبت ابي اوقف بقصيدة قريتها بأحدى المنتديات :

وش تسوي لو عشقت انسان ماهو من نصيبك
لا لك بهالوضع يد .. و لا له بهالوضع سبه !!
وشهو ذنبك لو غدى من بين خلق الله حبيبك
تعرف إن قربه محال .. و قلبك مصمم يحبه ؟!
و انته متأكد و عارف يب يجي يوم و يسيبك
يعني متوقع بأي لحظه يغيب و تغترب به
كل دربٍ يرحل بطيفه .. على وجهك يجيبك
كل حرفٍ يُكتب لغيره .. تحسه منكتب به !!
كن كل عيون خلق الله عيون ٍ له تذيبك
تنثر احساسك جمر ملح وْعلى جرحك تصبه
و اللي كاسر ظهر قلبك و بشقا الدنيا مصيبك
عارفٍ بانّك تحب .. و ما يعَرْف انّك تحبه
ساكن ٍ بأصغر تفاصيلك و قلبه ما دري بك
ماكن ٍ بأقصى معاليق الكيان اللي لعب به
وش تسوي لو مرضت بعشق من وصله طبيبك
و انتْ عارف لو ذبحك العشق ما داواك طبه !!


ماتبون تعرفون قصتي مع النت وكيف ابتدت بعد أيام حلوه بالثانوية وبعد حفلة التخرج ولبس روب التخرج شعور جميل رهيب خيالي حطولنا أغنية نجحنا حقت احلام وأغنية عبدالحليم حافظ الناجح يرفع ايدوه وناسه على اني كنت اخر صف بالحفله يعني تقديري مقبول الا اني كني كنت متفوقه (أقص على نفسي ) بالصراحه زعلت اني تخرجت بنسبه مو بحلوه قلت في نفسي اعوضها انشالله (عقب شنو ) بالصيف كان زواج اخواني الثنين مع بعض وكان اول عرس يقربلنا يعني عرس لاخواني قبل العرس عرفت النت تعلمته من بنت خالتي شيخه عالم غريب أكلم شباب شلون وكيف اتجرء تقولي شيخه عادي احد بيعرفج ولابيعرف انتي بنت ولاحتى ولد بيعرف انتي جيكره حلوه طويله قصيره مراح يعرف عنج أي شي ايه هذا الشات ادش بأي نك وأدش وأسولف وأضحك صرت عريفه للنت للماسنجر للشات لكل شي تقريبا الا الهكرز كنت اتمنى اعرفله بس للاسف ماعرفتله ... كنت اضحك على الشباب وامصخرهم ويمصخروني الشات مااقول انه مفيد بس والله استفد منه اشياء كثيره كنت اكلم اشخاص من كل الانواع والمستويات كنت اكلم شعراء مهندسين ناس مثقفه وكنت اكلم بعد مستهترين بس بعد ماكنت اتعدى حدودي حتى لو غلطت في شي مااحب اتمادى فيه اكتفي بهالغلط واحاول اني استفيد منه كل هذا وانا لازلت احب خالد أي والله احبه ولا نسيته بس احاول امهد لنفسي لحادثه بتصير علشان ماانهار لاني ادري ان خالد مو لي خالد لبنت عمه ..تعرفت على نواف بالنت كان شاب طيب حبوب كنت معجبه فيه ( الا الآن ماحبيته قلبي كان لخالد ) وهو كان في البداية يبدي اعجابه فيني ..تبون تعرفون كيف كانت علاقتي مع نواف وكيف انها تطورت قبل لاقولكم بقولكم عن خالد جاني خبر ان بنت عمه تزوجت معقوله وخالد شلون ! يعني خالد مراح يتزوجها يعني صار في أمل اني اكون له وهو لي بعد ماكنت فاقده الامل وكنت احاول افكر بأي احد يكون زوج لي غير خالد علشان امهد لنفسي الصدمه .. فرحه ماتوصف تمنيت اني طير ولي جنحان(ن) وطير فرحت لبدور ايه اسم بنت عم خالد بدور فرحانه لها وتمنيت لها التوفيق بهالزواج وكان خاطري اشكرها انها اتركت لي خالد رحت اجهز لهزواج وكأن هالزواج بداية حياتي انا مع خالد بعد زواجها سمعت ان ابو خالد يبي اخت بدور الصغيره لخالد قلت في نفسي لا شلون وكيف يبون يذبحوني بعد مابديت اعيش لازم خالد يعرف ايه لازم يعرف ان فهالدنيا انسانه عايشه علشانه وبتموت علشانه ..

كنت أنا طفله تحبك وتغليك ... كبرت وكبر الحب والغلا وياي

ثلاث ساعات نسيت الاهل نسيت السمعه نسيت كل شي الي بس كنت اتذكره ان خالد لازم يعرف يعرف عن حب عمره مايقارب 15 سنه حب طفوله ومراهقه ونضج ومستعد يكون لاخر العمر وياه ...

رحت لتلفون واحد من اخواني وفتحت الاسماء ادور على خالد لقيت اسمه أخذت نفس عميق وانا مدري وش بعد هالتصرف الجنوني وش بيكون كان احساسي غريب ماكنت خايفه كثير مع اني طول عمري كنت خوافه حسيت بقوه بحياتي ماحسيتها اخذت تلفوني واتصلت عليه قال
آآآلو
ويازينها من آلو حسيت رعشه في قلبي و شغلت اغنية

عمري ماتمنيت شي قد ماتمنيت أشوفك ...وأروي عيني من حلاك وتلمس كفوفي كفوفك...
لاتحسسني بخوف وتعتذرلي بالظروف...حتى انا عندي ظروف يمكن اصعب من ظروفك...

سكرت التلفون بعد ماسمع الاغنيه بدون مايعلق ولاحتى يقول شي

ارسلت له هالمسج


متى تحس إن الهوى شي مقسوم
من قسمة الخالق على خلقه يصير
ومتى تحس إني لك أطيح وأقوم
وأتعب على شانك وأقدرك وآغير

لي في هواك أحلام وأمال وعلوم
وأحزاب وأصحاب وقصيد وجماهير
وهموم وأفكار وهواجيس وحلوم
ودروب وأخطار وعذاب ومشاوير
وحب وغلا وإخلاص ومعاند ولوم
وإحساس وإلهام وشعور وتفاكير
وصحبة سهر ومقاطعة لذة النوم
وأشواق جياشه وعشق وتعابير
في ذمتك مابان لك شي مكتوم
من بعد ماصورت الأوضاع تصوير
لاتحسب إنك شي عابر ومعدوم
وتاريخ حبك فاق كل الأساطير

ارسل
" أنت منو "
ارسلت
"قول انتي منو "
ارسل
"اقول عن الخرابيط اخلص انت من ؟ "
ارسلت
"انا بنت بس ارسلت مسج بالغلط اسفه "
ارسل
"اوكي حصل خير "

مرت ربع ساعه اذا مو أقل حسيت اني لازم اقوله ومثل مااقررت من اول اني ماأتراجع في قراري

ارسلت
"بالصراحه انا قاصده ارسلك وانا اعرفك انت خالد وانا حبيت ارسلك علشان تعرف ان فهالدنيا انسانه عايشه طول عمرها تحبك"
ارسل
" وانا بعد أحبك "

استغربت من رده قلت اكيد يحسبه مقلب علشان جذي لازم أأكدله انه مو مقلب

ارسلتله
"انا صادقه بكل كلمه قلتها لك وانا فعلا احبك واكيد تعتقد انه مقلب بس يعلم الله اني صادقه بكل كلمه ارسلتها لك"

ارسل
"طيب انتي منو "

ارسلت
"انا وحده من بنات جماعتك مراح تتوقعها ابد "

ارسل
"اتمنى تكونين الي في بالي "

ارسلت
"قولي منو الي في بالك صدقني والله راح اقولك انا منو وانا مرسله علشان اقولك ومراح اغير قراري حتى من بعد ماتقول ؟"

تواصلنا برسايل كثيره وذكرت فيها كل البنات الي يقربن له ان يمكن تكون وحده فيهن تكون هي الي في باله ومالكه قلبه بس مااخذت منه لاحق ولاباطل
وقررت اني اعترفله
قبل اقولكم وشصار بعد الاعتراف ابقولكم ان خالد سعودي وخواله بالكويت بعد مارسلتله هالمسج
"انا ادري ومتاكده اني مو الي في بالك وادري بعد انك ماراح تتوقعني ابد بس راح اقولك انا منو ؟
انا انا نوف"

انتظرت منه مسج مارد

ارسلت هالمسج
"انصدمت صح انا خلاص مايهني اهم شي اني قلتلك وبس ولازم تعرف اني عشت حياتي كلها بكل مراحلها احبك؟ "

ارسل
" لاياحياتي مانصدمت بس انا عندي رياجيل ارد عليج بعدين "

بالصراحه انصدمت من رسالته يحسبني من البنات الي يتسلا معاهم أو أو يمكن يحسبني خالته !!

ايه يمكن يحسبني خالته اسم خالته نوف أكيد يحسبني نوف خالته

ارسلت
" انت عرفت أي نوف انا "

ارسل
" نوف أم فهد خالتي "

ارسلت
" انا مو نوف خالتك مافي غير نوف خالتك بالكويت "

من بعد هالمسج ماارد علي وانتظرت انتظرت ماارد علي يأست وفقدت الأمل عرفت انه عرفني بس مايبيني ايه اكيد مايبيني ولو انه يبيني كان رد علي
يمكن تقولون كيف راح يعرفج ؟..خالد يقربلي يعني من الجماعه

كانت هالمسجات الي بينا بظرف ثلاث ساعات بعدها وعيت بس بعد شنو بعد ماحسيت اني ذليت نفسي لاانسان اقول مايستاهل مايهون علي حب عمره 15 سنه حتى لو ماكان يدري يكفي ان قلبي يدري ..

_________________

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
فراشة حائرة
مدير المنتدى
مدير المنتدى
avatar

عدد الرسائل : 1280
العمر : 29
sms :


My SMS
معـــــــــــا للارتقاء بالمنتدى


سبحان الله وبحمده


الاوسمة :
&n :
علم :
المهنة :
النادى المفضل :
تاريخ التسجيل : 04/12/2007

مُساهمةموضوع: رد: قصة ثلاث بنك واحد   2008-07-13, 4:00 pm

بثلاث ساعات هاذي كانت معاي اميره ومنار حتى مااقدرن ينصحني ويمنعني يمكن لاني كنت جاده ومصره ان انهي هالعلاقه اما بشي يفرح او محزن بس ليتتني مادريت ولاعرفت ان هالانسان لو درى مابيكون لي!!!!

ماتاقف الدنيا علشان رجال............لاصار هو والغدر توم وولايف
ومن خان عهد الحب خاين ومحتال...وماتلحقه بنت الحمايل حسايف

من بعد الي صارلي وبالنفس اليوم شبكت وكلمت نواف هو من قبل كان يعترفلي بحبه لي وانا ماكنت اعطيه ذاك الاهتمام ودار بينا هالحديث بالماسنجر :

نوف : السلام عليكم
نواف :هلا بنوفتي وعليكم السلام
نوف :هلا فيك
نواف :منوره المااسنجر
نوف : ادري هههههههههه
نواف : فديت الواثقه
نوف: شلونك نواف ؟
نواف : انا بخير لما شفتج
نوف : دوم بخير انشالله
نواف : شفيج نوفتي فيج شي ؟
نوف :لا مافيني شي
نواف: طيب وينج صارلج فتره ماشبكتي
نوف: انت تدري يانواف انا اذا كنت فرحانه مااشبك والفتره الي فاتت كنت فرحانه بس يافرحه ماتمت
نواف : شفيج نوفتي خوفتيني عليج انتي تعرفين اني احبج حتى لو ماتحبيني صدقيني انا اخاف عليج قوليلي شفيج ياحياتي يانوف
نوف: لاعادي ولايهمك سالفه صارت وانتهت على خير\
نواف : براحتج يانوف اذا ماتبين تقولين اهم شي انج بخير
نوف : يالله عاد انا شابكه علشان افرفش واستانس
نواف : افا عليج ماطلبتي شي استقبلي هالاغنيه

تدري ليه أسال عليك ...وأنسى هالعالم وأجيك
تدري ليه تبكي عيوني ...كل ماأنظر إليك
اعترف اني هويتك...واني بعيوني فديتك
واعترفلك ياحياتي... غيرك انت ماأبي

نوف : يسلموووووو نواف على الاغنيه كلك ذوووووق
نواف : ادري كلي ذوق والدليل حبيتج انتي
نوف : ههههههههههه
نواف : نوف ممكن طلب
نوف : ايه نواف آمر
نواف : نوف انتي تدرين اني أحبج واموت عليج ودي اسمع صوت الي احبها
نوف : لايبابا مافيه لاصوت ولاصوره ولابطيخ
نواف: نوفتي ليه طيب
نوف : نواف قلتلك مافيه وانت بكيفك
نواف : افا نوف
نوف: اقول نواف انا بطلع مع السلامه
نواف: تعالي
نواف : لاتطلعين
نوف : نواف اذا تعزني ماتطلب انك تسمع صوتي ولا تشوف صورتي
نواف : خلاص الله يعيني
نوف : ايه خلك جذي
نواف : نوف لازم اطلع
نوف : يؤؤؤؤؤؤؤ ليه
نواف : ابوي بيقعد لصلاة ولو شافني الحين سهران وشابك لعن خيري
نوف : هههههههههه الله يعينك يالله مع السلامه حفظك الله
نواف: مع السلامه نوفتي

حسيت بعد هالحديث بشي غريب يمكن يكون كاذب ليه اقول يمكن انا لما كنت اكلمه ماكنت ابد اصدقه ليه الحين بديت اصدق شعوره ناحيتي ..
علشان خالد ماعطاني الاهتمام الي لقيته عند نواف ؟
والله مادري هالشعور الي صرت اكنه لنواف حب او مجرد سراب ووهم احاول عن طريقه اخفف من شي بداخلي كان بينهار .
بس الشي الي صرت اعرفه اني بديت احب نواف ...




بعد ذاك اليوم اختفى نواف وماصار يشبك وبالصراحه قلبي بدا يحاتي
ليه احاتي ؟ ياترى انا احبه ؟ احب نواف معقول ؟ وخاااااااااالد ؟ معقوله بهالسهوله يموت حبي لخالد الي ربى معي من كنت صغيره ؟يمكن انا مااحب نواف واحاول اعوض حبي الي خسرته في نواف ؟ او يمكن نسيت حبي لخالد واذكر بس نواف ؟
غريبه واحساس غريب ارسلت لنواف رساله بالايميل قبل لاقولكم وشهو محتوى الرساله نواف كان نكه بالشات ترك 2000ي المطيري الشاعر المعروف
محتوى الرساله :
الى شاعرنا الكبير تركي المطيري
السلام عليكم ورحمة الله وبركاته
شلونك نواف ؟ شخبارك وينك قاطعنا لك فتره تصدق والله ولك وحشه ياملعون ههههههه المهم اول ماتقرا الرساله نرجو منك الرد ياطويل العمر ههههههه

تحياتي
نوف الحلوه

بنفس اليوم شغلت الماسنجر الساعه 12 بالليل لقيت نواف شابك ودار بينا هالكلام

نواف : ولكمووووووووووووووووو نوفتي
نوف: يسلمووووووووووو
نواف هلا والله شلونج ؟
نوف: بخير انت شلونك ؟
نواف : انا بخير من بعد ماقريت الرساله
نوف : هههههههههههه
نواف : نوف وربي استانست من الرساله اول مره ترسليلي رساله! وصادقه انتي لما قلتي انج اشتقيلي ؟
نوف : لا اكذب عليك
نواف : نوف تكفين قول انج صادقه
نوف : ايه صادقه
نواف :يابعد عمري فديتج

وصار بينا تواصل غير طبيعي صرت اشبك علشانه من عقب ماكنت اشبك لشات وللمصخره صرت اشبك علشان اكلمه هو وصرت اغار عليه لدرجة اني طلبت منه الباسورد حق ايميله علشان اشوف الي ضايفهم بإيميله وفعلا عطاني الباسورد اميره كانت تعرفه كانت ساعات تشبك من جهازها ونسولف مع بعض بالمااسنجر هي ورفيجتها مها كانو يحاولون يجرون نواف يمهم بس ماكان يعطيهم ذاك الاهتمام الي يعطيني اياه انا غريبه او يمكن علشان هم يقربولي ...بس لا انا اكثر من مره غيرت نكي ودشيت بنك جديد وكلمته بالشات وماكان يعطيني وجه معقووله يحبني بصدق بالصراحه انا مااصدقه بس الي اعرفه اني انا احبه مع انه يحلف بربه وباهله انه يحبني ..

ابكلمكم شوي عن حياتي بالبيت اميره ومنار خواتي من ابوي واميره قريبه من سني عندي ثلاث خوات من امي وابوي الكبيره عبير والثانيه هنوف وبعدين انا وبعدين اختي الريف عبير متزوجه وهنوف ملجه وزواجها بعد اربع اشهر وانا ادور على نصيبي هههههههههه عندي 5 أخوان اثنين متزوجين وزوجاتهم قريباتي وحده من زوجات اخواني كبري وكانت رفيجتي قبل لاتتزوج اخوي يعني كنا نسولف ونلعب مع بعض ....بالصراحه لكل سن زمن يعني ماصرت اسولف معاها مثل اول هي صارت متزوجه وفي بعض السوالف ماتروقلها مثل مابعض سوالفها ماتعجبني عن الزواج واشياء خاصه احس بدري علي يمكن مو بدري بس انا مو متزوجه علشان تقولي هالكلام ياليت بس بالبيت حتى بادوام مع رفيجاتي عندي رفيجتي خوية الرووح امووت عليها اسمها فاطمه متزوجه من مذيع معروف وكل الي بالاكاديميه يسئلونا انتم خوات لان احنا بالنقاب نشبه بعض مع اني اشوف انها احلى مني بس يمكن قربنا مع بعض بان بعيونا شي حلو وانا بالصراحه فرحانه اني تعرفت عليها هي تسولفلي عن حياتها بس اشياء سطحيه ماتتعمق بالسوالف وفي السكشن تلزقت وحده فينا من نفس قبيلة فاطمه رفيجتي وكانت متزوجه وجرت فاطمه صوبها وبما ان هي متزوجه وفطوم متزوجه استانست فاطمه ولقت وحده تفهمها بالصراحه ان بديت اغار وكنت احاول اجلس معاهم بس ساعات سوالفهم اكش منها واذا كانت علينا محاضرة كمبيوتر ارووح اشبك وادش شات واسولف وتنقهر فاطمه رفيجتي انا بالصراحه استانست احس انتقمت لنفسي ومثل ماهي تسولف مع ريموو وخلتني انا بعد اسولف بالشات وخليتها بس بعد ماازعل عليها اغليها واموت عليها بس شوي اقهرها بعد ماخلصنا وتخرجنا بس باقي الامتحانات ريم ماتسلم على فاطمه وصارت فاطمه تشتكيلي تقول ان ريم من النوع ان خلصنا خلاص وانتهى الي بينا الي كان مجمعنا انتهى يعني ماصارت تتصل فيها ولا وترسل لها مسجات مثل اول ..
اقرب قريباتي بنات خالي وكل الي بكبري تزوجن الا انا عانسه اقصد انسه هههههههه صرت مااحب اروح لبيت خالي كل سوالفهن عن ازواجهن وانا مالي زوج اسولف عنه ههههههه فكنت اقول لامي ان مالي خلق اروح لاني فعلا مااستانس ...
الخميس الي فات طلعنا كلنا للبحاره وبالصراحه انا استانست كل بنات خالي راحوا معانا تمشيت انا وبنت خالي دلال العروس صارلها ثلاث اشهر متزوجه تمشينا بسوق البحاره والقينا في البنات المتزوجات (خواتي وخاوتها ) وراحت معاهم دلال اما انا لقيت البنوتات الصغار (بعمر 16 و17 و18 و19 ) ورحت معاهم ودشنا على محل يبيع الات موسيقيه ورحت اخذت انا الة العوود ودقيت عوود والي اخذت الطبله والي اخذت الجيتار ( حشى طقاقات ) هههههههههه رديت لجمعة البنات جالسات يسولفن وانا ماحب الجلسه احب ادوووج واتمشى مليت شفت تلفوني شغلت البلوتوث وكتبت نكي جراح ورقم مميز وكانن البنات مشغلات البلوتوث واجلس ارسل لبنت خالتي شيخه "انا جراح وولد عز اتصلي على والله لااغرقج فلووس " اجلسو يضحكون وهم ماشكو فيني وكل مارسلت وحده فيهن استانست وقالت جراح ارسلي اما شيخه بنت خالتي انكسرت ارقبتها وهي ادور على جراح هذا ياعيشه ههههههههههه وشيخه بنت خالتي متينه ارسلتلها " انتي أي وحده فيهم انتي المتينه " لو تشوفون وجهها شلون قمط ياربي هذا شلون درى هههههههههههههه وكانت شيخه كل مارسلتلها تتردد انها تستقبل تقول اخاف يقدر يعرف رقمي ارسلتلها انا " اتصلي ولا ترى انا بتصل " وتجلس البنت ترتجف من الخوف ياعيشه ههههههه ارسلت " انا بروح للالعاب وانتي تعالي اوكي ياحياتي " مادري كيف تجرات وارسلت " اوكي انتظرني الساعه عشر الصبح يوم السبت على قناة الراي " ههههههههههههه " ارسلت قلت " تجين بكيفج ولا اجيبج بطريقتي ياحياتي " هي كانت تبي ترسل بس انا سبقتها وارسلت " اصلا انتن بنات ماتستحن " هي قمط وجها وهونت ترسل بعدين قلت المفاجئه الي كانت ترسلكم هي انا شيخة استحت وقالت اشوا انج طلعتي انتي ههههههههههههه يعني كانت الجلسه مو عاجبتني بس انا بطرقتي خليتها تعجبني واستانست شوي رحت عنهم ورحت مع البنوتات نلعب بالالعاب رحنا بلعبة بزاويه كانت الللعبة سفينه وركبنا كلنا والي كانت تصرخ والي كانت تغني والي كانت تبجي وناسه ورجال كبير بالسن ماخذ عياله الورعان كان يبي يلعبهم جلس يطالع فينا ويضحك صج عوود وعينه زايغه ههههههههه ونزلنا ورحت اتمشى مع بنت خالي مريوم عمرها 19 ومر بجمبنا رجال شاب مع ولده صغير وقال لولده وهو يأشر علي " شرايك يبابا بهذي اتزوجها " رحنا وضحكنا انا ومريوم يحليله ياخذ شور ولده وامه وين ههههههههههههه
ورحنا للبحر وتسابقنا ماكان فيه احد واحنا اخذنا راحتنا بالصراحه كان يوم ولا اروووع ..


اتمنى ان بداية قصتي نالت اعجاابكم انتظرووا التكمله وانتظرووا ؟؟؟

اتمنى الاقي الردود الطيبه
تقبلو تحياتي








منقوووووووول

_________________

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ورد الليل
فراشة جديد
فراشة جديد
avatar

عدد الرسائل : 8
العمر : 41
sms :


My SMS
يعطيك الف عافية


&n :
تاريخ التسجيل : 23/06/2008

مُساهمةموضوع: رد: قصة ثلاث بنك واحد   2008-07-13, 4:57 pm

شكرا على القصة
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
عاشقة الرومانسية
فراشة ذهبى
فراشة ذهبى
avatar

عدد الرسائل : 407
العمر : 32
sms : <!--- MySMS By AlBa7ar Semauae.com --><form method="POST" action="--WEBBOT-SELF--"><!--webbot bot="SaveResults" u-file="fpweb:///_private/form_results.csv" s-format="TEXT/CSV" s-label-fields="TRUE" --><fieldset style="padding: 2; width:208; height:104"><legend><b>My SMS</b></legend><marquee onmouseover="this.stop()" onmouseout="this.start()" direction="up" scrolldelay="2" scrollamount="1" style="text-align: center; font-family: Tahoma; " height="78"> يعطيك الف عافية</marquee></fieldset></form><!--- MySMS By AlBa7ar Semauae.com -->
&n :
تاريخ التسجيل : 10/12/2007

مُساهمةموضوع: رد: قصة ثلاث بنك واحد   2008-08-14, 3:50 pm

يعطيكى العافية على القصة


وبارك الله فيكى


شكراااا
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
يويو
نائب المدير العام
نائب المدير العام
avatar

عدد الرسائل : 912
العمر : 29
sms :


My SMS
يعطيك الف عافية


الاوسمة :
&n :
علم :
المهنة :
النادى المفضل :
تاريخ التسجيل : 07/12/2007

مُساهمةموضوع: رد: قصة ثلاث بنك واحد   2008-08-28, 6:34 am


_________________
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
قصة ثلاث بنك واحد
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
فراشة حائرة :: فراشة حائرة :: ("المنتديات الادبية") :: فراشة القصص والحكايات-
انتقل الى: